Luk 18 | KYG | STEP | Agaemo vaya'mogimo muki afina'mo nunumu'mo hisaya kavafe'mo alaga'mo hapaesige'a o'atalesaya kavafe'mo ani agufa aeno kalafefa gemo huno hapa pai'niye.

Luke 18

Kogu a'e agoti gemo ne'afiya veka'efe'mo anava gemo hu'niya gemae

1 Agaemo vaya'mogimo muki afina'mo nunumu'mo hisaya kavafe'mo alaga'mo hapaesige'a o'atalesaya kavafe'mo ani agufa aeno kalafefa gemo huno hapa pai'niye. 2 Agaemo, mago agoti gemo ne'afiya vekamo mago taonifi'mo mai'neno Gotife'mo koli osuge muki vaya'aife'mo koli osuge huno mai'niye. 3 Mai'nigeno'ae'mo ani taonifi'mo mago kogu a kanomo'mo muki afina'mo ani vekalegamo uno ha paino'ae'mo, kame huno ne'nateya vekamo'a nagaetegamo hosu kava'mo nehigi alika fako huka la'ato, huno ha paige ha paige huno mai'niye. 4 Hogoteno ha o'maeno afa'a mai'niyana henaga'amo aipafi'mo agesa afino'ae'mo, Gotife'mo koli osuge vaya'aife'mo koli osuge hu'nova'monanafa 5 mani kogu a kanomo'a lusi kava huno alaga ne'nahaeya agufa gemo nehiyanage'na afa'a ali'na fako hu'na ategauve. Ali'na fako hu'na o'atesuvana muki afina'mo ege ege huno maisigeno mago'e huno lusi alaga'mo nahaegaiye, huno agesa afi'niye. 6 Ala kava ne'mo'a, hosu vekamo'a agoti gemo ne'afisiya vekamo ge'amo afiyo. 7 Goti'a lekana paino apate'niya vaya'mogi muki feluga'a'e hani'ilaga'a'e'mo aukaya hu'a ge huge huge nehisageno'ae'mo ani kava'mo huno afiteno alino fako huno apateteno afa'a hapa o'maesifiye. Yatala afina'mo apakava maisiyana afa'a hapa maegaiye. 8 Lama gemo lapa nepauve, malage huno alino fako huno apateteno hapa maegaiya'monanafa Vemo Mafa'nemo emineno kahauya huno apakesa afi'a fatago nehaya vaya'mo apakesifiye, huno hapa pai'niye.

Falasi veka'e takesi monimo ne'aliya veka'efe'mo anava gemo hu'niya gemae

9 Mago vaya'mogi Gotife'mo apakesa o'afi'a apakai'apieke'mo apakesa afi'apae'mo, lagaemo alagepa vaya'mo mai'nonanageta lagaitimo laha maegauna'monanafa mago alu vaya'mo afa'a ina agufa vaya'mo mai'nae, hu'a nehaya vaya'aife'mo Yesu'a ina gemo aeno kalafefa gemo huno hapa pai'niye. 10 Lole vekala'moganimo nunumu'mo hisa'afe'mo Yu vaya'ai alopa mono nopi'mo hai'na'ae. Mago vekamo Falasi vekamo maigeno alu vekamo takesi moni ne'aliya vekamo mai'niye. 11 Falasi vekamo'mo he tino mai'neno agai'ae'mo nunumu'mo hu'niye. Nunumu'mo huno'ae'mo, Gotiyo, muki alu vayakana hu'na o'mai'nova'mofe'mo kahao ke nehove. Mago kanale kava'mo osuge aigofe gemo hute'a kumaya'mo alige kumai kava'mo huge nehaya vayakana hu'na o'mai'nove. Ani takesi monimo ne'aliya vekagana hu'na o'mai'nove. 12 Nagaemo muki sale'ae sale'ae'mo ne'ya'mo nete'na lole afina'mo o'ne'na mo si'nove. Nagaemo muki ali'nova yapati'mo naeni'a ya'mo alite'na magoke ya'mo nekamuve, huno nunumu'mo hu'niye. 13 Hu'niya'monanafa takesi monimo ne'aliya vekamo afagi'ale'mo he tino mai'neno alino maku huno o'age'neno haifi'yale'mo ne'amagino'ae'mo, Gotiyo, alagi hosu vekamo mai'novanagi kaipamo lanitani huka nateteka kahau huka nato, huno nunumu'mo hu'niye. 14 Lapa nepauve, Goti'a takesi moni ne'aliya vekae'mo, naulagale'mo fatago vekamo mai'nane, huno ha pai'nigeno no'alegamo uno fatago vekamo mai'niya'monanafa alu vekamo mago ya'mo o'alino afa'a u'niye. Goti'a muki vaya'mogimo apakai'api apaki'apile'mo ali'a asaga hu'a ne'atesaya vaya'ai apaki'apile'mo alino afepi apategaiya'monanafa Goti'a apakai'api apaki'apile'mo ali'a afepi ne'atesaya vaya'ai apaki'apile'mo alino asaga huno apategaiye, huno hapa pai'niye.

Yesu'a asago mafa'ne anaga'aife'mo Goti'a lapa maeno, huno hu'niya gemae

(Mt 19:13-15; Mk 10:13-16)

15 Yesu'a asago mafa'ne anaga'ai apakufale'mo aya'mo malesiyafe'mo apavaleli'a ne'age'apae'mo ge'amo ne'afiya vaya'mogi apakete'apae'mo ge hapau'nae. 16 Ge hapau'naya'monanafa Yesu'a aise mafa'ne'aife'mo, nagaetegamo eyo, huno huteno, ka akanitapa o'apatetapa afa'a apatalege'apao nagaetegamo o'meyo, hutapa osiyo. Goti'a yagaino ne'apateya kegi'yafi'mo ani agufa mafa'negana vaya'mo hai'a maigae. 17 Lama gemo lapa nepauve, Vaya'mogi Goti'a yagaino ne'apateya ya'mo aise mafa'nemogi ne'aliya kava hu'a no'alisayana Goti'a yagaino ne'apateya kegi'yafi'mo afa'a fale'a ohaigae, huno hapa pai'niye.

Lusi kagemi ya'amo hane'niya vekamo'mo Yesutegamo e'niya gemae

(Mt 19:16-30; Mk 10:17-31)

18 Mago yagaino ne'apateya vekamo'a Yesufe'mo, alagepa tisao, alagepa hu'na maige maige hu'na maisuva ya'mo alisuvafe'mo na agufa kava'mo hisuve, huno afi ge'nigeno'ae'mo, 19 na kava higekae'mo nagaefe'mo alagepa tisao, huka nehane. Ma mopafi vayapati'mo mago alagepa vaya'mo o'mai'nafa Gotike'mo magoke'age'mo alagepa vekamo mai'niye. 20 Goti ke'aepa ge'amo ago afi'nane,

kumai kava'mo osuvo, vaya'mo ohapaeyo, kumaya'mo o'aliyo, aigofe gemo osuvo, itaka'afokala'mogani anaiyafi'mo mai'neka ge'animo afiyo,
huno ha pai'nigeno'ae'mo, 21 mafa'ne mai'nova afinateti'mo muki ani ke'aepa gemo akame hume hume e'na hemeni'e'mo mai'nove, huno ha pai'nigeno 22 Yesu'a ani gemo afiteno'ae'mo, magoke kava'atokamo aeka aga se'nane. Muki kagemi yakamo alika maketi huge'a miya faitesageka alisana monimo alika fako huka kagemi ya'apimo o'male'nisaya vaya'aina apamigeno'ao alagepa yakamo koku'napi'mo haneno. Ani kava'mo hutekae'mo eka nakame huvo, huno ha pai'nigeno 23 ani gemo afiteno'ae'mo lusi kagemi ya'amo hane'niya'mofe'mo lusi kava huno aipamo'mo kana hu'nigeno 24 hosu augosamo kali'nigeno Yesu'a ageteno'ae'mo, 25 kamo afugefamo'mo nekaya kapi'mo faleno haisiyafe'mo aise'amo lokiya vai'niya agufa kava'mo hane'niya'monanafa mago kagemi ya'e vekamo'mo Goti'a yagaino ne'apateya kegi'yafi'mo faleno haisiya kava'mo'a mago'e huno lusi lokiya vai'niya kava'mo hane'niye, huno ha pai'nige'a 26 afite'apae'mo, ina lagimo maige maige hu'a maisaya ya'mo afa'a aligae, hu'a afi ge'nageno'ae'mo, 27 vaya'mogimo alagi osisaya agufa kava'mo Goti'a afa'a hugiye, huno hapa pai'nigeno 28 Pita'a, afiyo, lagaemo muki yatimo ago ataleta eta kakame nehune, huno ha pai'nigeno'ae'mo, 29 lama gemo lapa nepauve, muki vaya'mogi Goti'a yagaino ne'apateya kavatefe'mo no'apimofi a'ne'apimofi konaga'apimogimofi ita'api afo'apimogimofi mafa'ne'apimofi hu'a apatale'a e'a mai'nisaya vaya'mo 30 ma mopafi mai'nageno'ae'mo Goti'a lusi kava huno mago'e ya'mo fiku ne'apamiyanageno henaga'amo afole aisiya afina'mo alagepa hu'a maige maige hu'a maigae, huno hapa pai'niye.

Yesu'a napa tali afina'mo, falite'na he tiguve, huno hapa pai'niya gemae

(Mt 20:17-19; Mk 10:32-34)

31 Yesu'a tuolofu'a vaya'mo apaote apavalelino uno'ae'mo, afiyo, Yulusalemu taonifi'mo ne'visunageno'ae'mo akeya'vilaga Gotitegati gemo alini e'a ae'a hakalo hu'a hapa nepaiya vaya'mogimo Vemo Mafa'nee'mo ava gemo avo'mo kae male'naya gemo afole aigiye. 32 Avaleli u'a alu vaya'ai apayapi'mo apamisage'apae'mo hosu kigi hu'a atege hu'a faipa hu'a atege apavenatu'na'mo he'a atege 33 nofi kayoteti'mo amagige hute'a kamiti amagisageno faliteno lole'e mago'e afina'mo utesigeno halate he tigiye, huno hapa pai'nige'apae'mo 34 afi'a aeto osu'nae. Ani gemo aepa'amo afi'a aeto osisaya agufa gemo fala ki'niya gemo hane'niya'mofe'mo alagepa hu'a o'afi'nae.

Yesu'a aulagamo ali hu'niya vekamo alino ayakeno ate'niya gemae

(Mt 20:29-34; Mk 10:46-52)

35 Yesu'a Yeliko taonimo haopale'mo ne'egeno'ae'mo mago aulaga ali hu'niya vekamo ka agi'nale'mo mai'neno'ae'mo muki vaya'aife'mo monie'mo aukaya huge huge huno mai'niye. 36 Asole vaya'mo e'a ai'a aga se'a ute ute hu'nageno apaiya gemo afiteno'ae'mo, na agufa kava'mo nehae, huno apafi ge'nige'apae'mo, 37 Yesu'a Nasalasa kotega vekamo ne'e, hu'a ha pai'nageno afiteno'ae'mo 38 alopa gefati'mo ge huno'ae'mo, Nevini'a ala kini vekamo aginagomo Yesuo, kahau huka nato, huno ge hu'nige'a 39 hogote'a e'naya vaya'mogimo, ge osuka afa'a maiyo, hu'a ge hau'naya'monanafa mago'e huno ge huno'ae'mo, Nevini'a ala kini vekamo aginagomo, kahau huka nato, huno ge hu'nigeno 40 Yesu'a eno he tino mai'neno'ae'mo, avalelitapa eyo, huno hapa pai'nige'apae'mo avaleli'a e'nageno'ae'mo, 41 kagaemo na kava hu'na katesuvafe'mo nehane, huno afi ge'nigeno'ae'mo, Ala kava nene, naulaga'nimo alika ayakeka nato, huno ha pai'nigeno 42 Yesu'a, kaulagamo afa ageka ayako. Nagaefe'mo kagesa afika fatago hu'nana kavakamo'a alino alagepa huno kate'niye, huno ha pai'nigeno 43 malage huno aulagamo ageno ayaketeno akame huno ne'uno'ae'mo Goti agi'ale'mo alino asaga hume asaga hume u'nige'a agete'apae'mo muki vaya'amogimo Goti agi'ale'mo ali'a asaga hu'a ate'nae.